பெரம்பலூர் மாவட்டத்தில் முதல் இடம் பிடித்த லப்பைக்குடிகாடு முகமது யூனுஸ்
பெரம்பலூர்: பிளஸ் 2 பொதுத்தேர்வில் பெரம்பலூர் மாவட்ட அளவில் முதல் 3 இடங்களை பிடித்த மாணவர்கள் டாக்டர் ஆவதே லட்சியம் என்று தெரிவித்துள்ளனர்.
தமிழகம் முழுவதும் பிளஸ் 2 பொதுத்தேர்வு மார்ச் 8ம் தேதி தொடங்கியது. பெரம்பலூர் மாவட்டத்தில் 55 மேல்நிலைப்பள்ளிகளை சேர்ந்த 3,685 மாணவர்கள், 3,469 மாணவிகள் என மொத்தம் 7,154 பேர் 21 மையங்களில் தேர்வு எழுதினர். இந்நிலையில் தேர்வு முடிவுகள் நேற்று வெளியிடப்பட்டன. இதில் பெரம்பலூர் மாவட்ட அளவில் முதல் 3 இடங்களை பெரம்பலூர் தனலட்சுமி சீனிவாசன் மேல்நிலைப்பள்ளி மாணவர்கள் தட்டி சென்றனர்.
பெரம்பலூர் தனலட்சுமி சீனிவாசன் மேல்நிலைப்பள்ளியை சேர்ந்த மாணவன் முகமது யூனுஸ் 1200க்கு 1175 மதிப்பெண் பெற்று மாவட்ட அளவில் முதலிடம் பிடித்தார். இவர் பாடவாரியாக தமிழ் 193, ஆங்கிலம் 189, கணிதம் 200, இயற்பியல் 200, வேதியியல் 199, உயிரியியல் 194 மதிப்பெண் பெற்றுள்ளார். குன்னம் தாலுகா, லப்பைக்குடிகாட்டை சேர்ந்த இவரது பெற்றோர் முகமது ஜக்கரியா, செல்வகனி. முகமது யூனுசிற்கு முகமது இஸ்மாயில்(15), அஸ்மிதா(14) ஆகிய தம்பி, தங்கைகள் உள்ளனர். இவர்களது தந்தை முகமது ஜக்கரியா மரச்சாமான்கள் விற்பனை செய்யும் கடையில் பணிபுரிந்து வருகிறார். மருத்துவ படிப்புக்கு தேவையான கட்ஆப் மதிப்பெண் (196.75) பெற்றுள்ள முகமது யூனுஸ் டாக்டராவதே தனது லட்சியம் என்று தெரிவித்துள்ளார்.
இதே பள்ளியை சேர்ந்த மாணவர் பட்டுராஜ் 1,174 மதிப்பெண் பெற்று மாவட்ட அளவில் 2ம் இடம் பெற்றுள்ளார். இவர் பாடவாரியாக தமிழ் 196, ஆங்கிலம் 189, கணிதம் 198, இயற்பியல் 195, வேதியியல் 199, உயிரியியல் 197 மதிப்பெண் பெற்றுள்ளார். இவர் மருத்துவ படிப்புக்கு தேவையான கட்ஆப் மதிப்பெண் 197 பெற்றுள்ளதால் டாக்டராக ஆவதே லட்சியம் என்று தெரிவித்துள்ளார். இப்பள்ளியை சேர்ந்த மற்றொரு மாணவர் மாதவன் 1,173 மதிப்பெண் பெற்று மாவட்ட அளவில் 3ம் இடம் பெற்றுள்ளார். இவர் பாடவாரியாக தமிழ் 194, ஆங்கிலம் 186, கணிதம் 199, இயற்பியல் 195, வேதியியல் 200, உயிரியியல் 199 மதிப்பெண் பெற்றுள்ளார்.
இவர் மருத்துவ படிப்புக்கு தேவையான கட் ஆப் மதிப்பெண் 198.25 பெற்றுள்ளதால் டாக்டராக ஆவதே லட்சியம் என்று தெரிவித்துள்ளார்.
கருத்துகள் இல்லை:
கருத்துரையிடுக