சென்னை, ஆக.1- தமிழக போலீஸ் துறையில் புதிதாக பணியில் சேர்ந்துள்ள 9 ஐ.பி.எஸ். அதிகாரிகள், தீவிரவாதத்தை ஒழிப்பது தொடர்பாக அதி நவீன பயிற்சிபெற இஸ்ரேல் நாட்டுக்கு செல்கின்றனர்.
தமிழக போலீஸ் துறைக்கு கலைச்செல்வன், சர்வேஸ்ராஜ், சுகுணாசிங், சக்திகணேசன், ஸ்ரீநாதா, சுஜித்குமார், அரவிந்த்மேனன், அருண்பாலகோபாலன், ருபேதா சலாம் என்ற 9 ஐ.பி.எஸ். அதிகாரிகள் புதிதாக பணியில் சேர்ந்துள்ளனர். 28 வாரங்கள் இவர்கள் பல்வேறு பயிற்சியை முடித்துள்ளனர்.
சென்னை போலீசில் ஜூலை மாதம் 8-ந் தேதியில் இருந்து 11-ந் தேதி வரை பயிற்சி பெற்றனர். போலீஸ் கமிஷனர் ஜார்ஜ் உள்ளிட்ட உயர் அதிகாரிகள் இவர்களுக்கு பாடம் நடத்தினார்கள்.
இவர்களில் 4 பேர் தமிழ்நாட்டை சேர்ந்தவர்கள். கலைச்செல்வன் ஈரோட்டையும், சர்வேஸ்ராஜ் சென்னை வேளச்சேரியையும், சுகுணாசிங் திருவள்ளூரையும், சக்திகணேசன் கோவையையும் சேர்ந்தவர்கள். ஒரே பெண் அதிகாரியான ருபேதா ஜம்மு காஷ்மீர் மாநிலத்தை சேர்ந்தவர். 2 பேர் கேரளாவையும், 2 பேர் வடமாநிலத்தையும் சேர்ந்தவர்கள்.
இவர்கள் 9 பேரும் இஸ்ரேல் நாட்டுக்கு நவீன பயிற்சிக்காக செல்கிறார்கள். புதிதாக தேர்வு செய்யப்பட்டுள்ள 150 ஐ.பி.எஸ். அதிகாரிகளை மத்திய அரசு இஸ்ரேலுக்கு அனுப்புகிறது. அவர்களுடன் இந்த தமிழக ஐ.பி.எஸ். அதிகாரிகளும் செல்கிறார்கள். 15 நாட்கள் அங்கு தங்கியிருந்து தீவிரவாதத்தை ஒழிப்பது தொடர்பாக இவர்கள் பயிற்சி பெறுவார்கள்.
இஸ்ரேல் நாட்டு போலீசார் தீவிரவாதிகளை ஒழிக்க நவீன யுக்திகள் மற்றும் தொழில்நுட்பம், நவீனரக ஆயுதங்களை கையாளுகிறார்கள். அது தொடர்பான பயிற்சியை நமது ஐ.பி.எஸ். அதிகாரிகள் பெறுகிறார்கள். இஸ்ரேலில் உள்ள ஜெருசலேம் நகருக்கு அருகே உள்ள நவீன போலீஸ் பயிற்சி அகாடமியில் தங்கியிருந்து இவர்கள் இந்த பயிற்சியை பெறுவார்கள்.
இந்திய ஐ.பி.எஸ். அதிகாரிகள், குறிப்பாக தமிழக ஐ.பி.எஸ். அதிகாரிகள் இஸ்ரேல் நாட்டில் நவீன பயிற்சிக்காக செல்வது இதுவே முதல்முறை என்று போலீஸ் வட்டாரத்தில் கூறப்படுகிறது.
கருத்துகள் இல்லை:
கருத்துரையிடுக