புதுடெல்லி: ஆம் ஆத்மி கட்சியின் விவசாயிகள் பேரணியில் ராஜஸ்தான் மாநிலத்தைச் சார்ந்த கஜேந்திர சிங் என்ற விவசாயி மரத்தில் ஏறி தூக்குப் போட்டு தற்கொலைச் செய்துகொண்டார்.இச்சம்பவத்தைக் கண்டித்து டெல்லி முதல்வர் அரவிந்த் கெஜ்ரிவால் வீட்டிற்கு முன்பாக இளைஞர் காங்கிரசார் போராட்டம் நடத்தினர்.விவசாயி தற்கொலைச் செய்வதை கெஜ்ரிவால் மேடையில் இருந்து கண்டபோதும் எதுவும் செய்யவில்லை என்றும் விவசாயி மரணித்த பிறகும் அரவிந்த் கெஜ்ரிவால், துணை முதல்வர் உள்ளிட்ட ஆம் ஆத்மி கட்சி தலைவர்கள் உரையை தொடர்ந்ததாகவும், பேரணியை நிறுத்தவில்லை என்றும் இளைஞர் காங்கிரசார் குற்றம் சாட்டுகின்றனர்.
விவசாயி தற்கொலைக்கு ஆம் ஆத்மி கட்சிதான் காரணம் என்று பா.ஜ.கவும் குற்றம் சாட்டியுள்ளது.
அதே வேளையில் தற்கொலைச் செய்த விவசாயி பா.ஜ.கவின் ஏஜண்ட் என்றும், ஆம் ஆத்மி கட்சி அரசுக்கு களங்கத்தை ஏற்படுத்துவதற்கான சூழ்ச்சி என்றும் ஆம் ஆத்மி கட்சி தலைவர் குமார் பிஸ்வாஸ் குற்றம் சாட்டியுள்ளார்.
விவசாயிகள் பேரணி நடைபெற்ற தினத்தன்று காலை 11 மணிக்கு தற்கொலைச் செய்த விவசாயி கஜேந்திரசிங் டெல்லி துணை முதல்வர் மனீஷ் சிசோடியாவை அவரது வீட்டில் சென்று சந்தித்ததாக கஜேந்திரசிங்கின் ஜெய்வீர்சிங் தெரிவித்துள்ளார்.ஏன் கஜேந்திரசிங்கை காப்பாற்ற முடியவில்லை? என்று அவர் கேள்வி எழுப்பியுள்ளார்.
இதனிடையே சம்பவம் தொடர்பாக டெல்லி காவல்துறை பதிவு செய்துள்ள முதல் தகவல் அறிக்கையில், ஆம் ஆத்மியின் தலைவர்களும், தொண்டர்களும் தான் விவசாயி கஜேந்திர சிங்கை தற்கொலைக்கு தூண்டியதாக குறிப்பிடப்பட்டுள்ளது. பேரணியில் பங்கேற்றவர்கள் செய்த இடையூறுகளால் தான் போலீசாரால் விவசாயியைக் காப்பாற்ற இயலவில்லை என்றும் அதில் கூறப்பட்டிருக்கிறது.
நன்றி தூது ஆன்லைன்
கருத்துகள் இல்லை:
கருத்துரையிடுக