இந்திய ரயில்களில் விற்கப்படும் ‘ரயில் நீர்’ பாட்டில்களுக்கு பதிலாக போலியான தண்ணீர் பாட்டில்கள் விற்கப்பட்டுள்ளது சி.பி.ஐ அதிகாரிகளால் கண்டுபிடிக்கப்பட்டு உள்ளது.
இந்த முறைகேடு ரயில்வே
அதிகாரிகளின் உதவியுடன், ரயில்வே காண்டிராக்டர்கள் போலியான தண்ணீர் பாட்டில்களை ரயில்களில் விற்பனை செய்துள்ளதாக சி.பி.ஐ அதிகாரிகள் தெரிவித்துள்ளனர்.இதுகுறித்து சிபிஐ செய்தித் தொடர்பாளர் தேவ்பிரீத் சிங் கூறும்போது, “வட மாநிலங்களில் இயக்கப்பட்டு வரும் ராஜ்தானி, ஷதாப்தி எக்ஸ்பிரஸ் ரயில்களில், ரயில்வே நிர்வாகத்தால் ‘ரயில் நீர்’ என்ற பெயரில் தயாரிக்கப்படும் சுத்திகரிக்கப்பட்ட குடிநீரே பயணிகளுக்கு விற்பனை செய்யப்பட வேண்டும்.
இந்த ரயில்களில் பயணிகளுக்கு உணவு மற்றும் குடிநீரை ஆர்கே அசோசியேட், சத்யம் கேட்டரர்ஸ் உள்ளிட்ட தனியார் நிறுவனங்கள் விநியோகித்து வருகின்றன. தனியார் நிறுவனங்களுக்காக ஒதுக்கப்படும் ‘ரயில் நீர்’ பாட்டில்கள் எடுத்துக்கொள்ளப்படாமல் இருந்ததால், இந்திய ரயில்வே உணவு விநியோகம் மற்றும் சுற்றுலா நிறுவனம் (ஐஆர்சிடிசி) ரயில்வே நிர்வாகத்திடம் புகார் அளித்தது.
இதையடுத்து, ‘ரயில் நீர்’ பாட்டில்கள் விரைவு ரயில்களில் விற்பனை செய்யப்பட வேண்டும் என்று சம்பந்தப்பட்ட அதிகாரிகளுக்கு ரயில்வே நிர்வாகம் உத்தரவிட்டது. ஆனாலும், ரயில்வே துறை தலைமை வணிக மேலாளர்கள் எம்.எஸ்.சாலியா, சந்தீப் சிலாஸ் ஆகியோரின் உதவியுடன் ‘ரயில் நீர்’ அல்லாத மலிவான விலையில் வெளிச்சந்தையில் கிடைக்கும் குடிநீர் பாட்டில்களை விரைவு ரயில்களில் தனியார் நிறுவனங்கள் விற்பனை செய்து வந்துள்ளது.
இதனால், அரசுக்கு வருவாய் இழப்பு ஏற்பட்டுள்ளது. இதைத் தொடர்ந்து அளிக்கப்பட்ட புகாரின்பேரில், மோசடியில் ஈடுபட்ட ரயில்வே அதிகாரிகள் 2 பேரின் வீடுகளிலும், தனியார் நிறுவன அலுவலகங்கள், அதன் உரிமையாளர்கள் வீடுகளிலும் சி.பி.ஐ. அதிகாரிகள் நேற்று (வெள்ளிக்கிழமை) சோதனை மேற்கொண்டனர்.
அந்த சோதனையில் கணக்கில் காட்டப்படாத ரூ.20 கோடியும், குற்ற ஆவணங்களும் கைப்பற்றப்பட்டு உள்ளன. மேலும், இது தொடர்பாக வடக்கு மண்டல ரயில்வேயின் முன்னாள் வணிக மேலாளர்கள் சாலியா மற்றும் சந்தீப் சிலாஸ் மீதும், 7 தனியார் நிறுவனங்கள் மீதும் வழக்குப்பதிவு செய்யப்பட்டுள்ளது.” என்றார்.
கருத்துகள் இல்லை:
கருத்துரையிடுக