தேர்தலில் விகிதாச்சார பிரதிநிதித்துவ முறையை அமல்படுத்துவது குறித்து ஆலோசிக்க வேண்டும் என, மத்திய அரசுக்கும், இந்திய தேர்தல் ஆணையத்திற்கும் வலியுறுத்தி, திமுக தீர்மானம் நிறைவேற்றியது.
மேலும், மக்களவை தேர்தலில் ஆளுங்கட்சியும் தேர்தல் ஆணையமும் எழுதப்படாத உடன்பாடு மூலமாக மிகப்பெரிய சதி செய்துள்ளதாக திமுக உயர்நிலை செயல்திட்டக் குழுவில் கண்டனத் தீர்மானம் நிறைவேற்றப்பட்டது.
மக்களவை தேர்தல் தோல்விக்கான காரணங்கள் குறித்து ஆராய திமுக உயர்நிலை செயல்திட்டக் குழுவின் கூட்டம் கட்சித் தலைவர் கருணாநிதி தலைமையில் சென்னையில் நடைபெற்றது.
இக்கூட்டத்தில் பொதுச்செயலாளர் அன்பழகன், பொருளாளர் மு.க. ஸ்டாலின், தலைமைக் கழக முதன்மைச் செயலாளர் ஆற்காடு வீராசாமி, துணைப் பொதுச் செயலாளர் துரைமுருகன் உள்ளிட்டோர் பங்கேற்றனர். திமுக உயர்நிலை செயல் திட்டக்குழு கூட்டத்தில் 7 தீர்மானங்கள் நிறைவேற்றப்பட்டன.
தீர்மானங்கள் விபரம்:
* 91 வயதிலும் ஓயாது பணியாற்றும் கருணாநிதியின் பிறந்தநாளை ஒட்டி, அவருக்கு வாழ்த்து தெரிவித்து தீர்மானம் நிறைவேற்றப்பட்டது.
* மக்களவைத் தேர்தலில், திமுக கூட்டணிக்கு வாக்களித்த 96 லட்சத்து 36 ஆயிரத்து 430 வாக்காளர்களுக்கும் நன்றி.
* மக்களவைத் தேர்தல் பிரச்சாரத்தில் ஈடுபட்ட திமுக தலைவர் கருணாநிதி, பொதுச்செயலாளர் அன்பழகம் மற்றும் பொருளாளர் ஸ்டாலினுக்கும் கூட்டணி கட்சித் தலைவர்களுக்கும் நன்றி.
* ஆளுங்கட்சியும் தேர்தல் ஆணையமும் எழுதப்படாத உடன்பாடு மூலமாக மிகப்பெரிய சதி செய்துள்ளது. புதிய வாக்காளர்களை சேர்ப்பது முதலாக தேர்தலுக்கு முதல் நாளன்று 144 தடை உத்தரவு பிறப்பித்தது வரை தேர்தல் ஆணையம், ஆளுங்கட்சி அராஜகங்களை வேடிக்கைப் பார்த்தது. ஆளுங்கட்சியின் அடாவடிகளையும், முறைகேடுகளையும் அவற்றை தடுத்து நிறுத்த வேண்டிய காவல்துறையும், தேர்தல் ஆணையமும் உறுதுணையாக இருந்ததை கண்டனத்துக்குரியது.
* பிரிட்டிஷ் காலனி ஆதிக்க நாடுகளைத் தவிர பிற நாடுகள் விகிதாச்சாரப் பிரதிநிதித்துவ முறையை கடைபிடித்து வருகின்றன. தேர்தலில் கட்சிகள் பெறும் வாக்கு விகிதத்துக்கு ஏற்ப, ஆட்சி மன்றங்களில் அந்தந்த கட்சிகளுக்கு பிரதிநிதித்துவம் கிடைக்கும். அந்த இடங்களுக்கான உறுப்பினர்களை கட்சி தேர்வு செய்து அனுப்பும். அனைத்திந்திய அளவில் விகிதாச்சார பிரதிநிதித்துவ முறையை அமல்படுத்துவது குறித்து ஆலோசிக்க என மத்திய அரசுக்கும், இந்திய தேர்தல் ஆணையத்திற்கும் வலியுறுத்தப்படுகிறது.
* திமு கழகத்தின் அமைப்பு விதிகளில் உரிய திருத்தங்களை மேற்கொள்ளலாம்.
* தேர்தல் தோல்வி குறித்து கழக வேட்பாளர்களும், பொறுப்பாளர்களும் தரும் அறிக்கைகளின் அடிப்படையில் உரிய நடவடிக்கை எடுக்கப்பட வேண்டுமென்று கழகத் தலைமைக்கு பரிதுரைக்கப்படுகிறது உள்ளிட்ட 7 தீர்மானங்கள் நிறைவேற்றப்பட்டன.
நன்றி தமிழ்இந்து
கருத்துகள் இல்லை:
கருத்துரையிடுக