டாக்டர் சார், மெடிகல் ஆபீசர் சார், கொஞ்சம் விளக்கமாகச் சொல்லுங்கள்...
தமிழகத்தில் நேற்று மருத்துவர்கள், பருத்துவர்கள் என்றால் பட்டம் பெற்ற மருத்துவர்கள், முக்கியமாக அல்லோபதி டாக்டர்கள் தங்களுக்குப் பாதுகாப்பில்லை எனவும், பாதுகாப்பு வேண்டும் எனவும் போராட்டம் நடத்தியுள்ளனர்.
வன்முறைகள் நாளுக்குநாள் பெருகி வருகின்றன. தலித்கள், பெண்கள், இப்படிப் பலதரப்பினரும் பாதுகாப்பு இல்லை எனத் தேருவில் இறங்கி நியாயம் கோருகின்றனர். அந்த வகையில் இப்போது மருத்துவர்கள்.
சரி, யாரால் நம் மருத்துவர்களுக்கு ஆபத்து?
பெரிய பெரிய மல்டி நேஷனல் மருந்துக் கம்பெனிகள், தாங்கள் எவ்வளவுதான் இந்த மருத்துவர்களுக்குப் பரிசளித்தாலும் தங்கள் கம்பெனி மருந்தை எழுதித் தள்ள மாட்டேன் என்கிறார்கள் என்பதற்காக ஆள் வைத்து அடிக்கிறார்களா?
சிசேரியன் உட்பட ஆபரேஷன்களைப் பரிந்துரைக்காமல் கூடியவரை இயற்கைப் பிரசவம் என்கிற ரீதியில் மருத்துவம் செய்து நோயாளிகளைக் குணப்படுத்தி அனுப்பி விடுகிறார்களே என்கிற ஆத்திரத்தில் தனியார் மருத்துவமனை உரிமையாளர்கள் இவர்களை மாஃபியாக்களை ஏவிக் காலி பண்ணுகிறார்களா?
இல்லை, காவல்துறை மற்றும் அரசின் விருப்பத்திற்கு எதிராக போலி என்கவுன்டர் முதலான பிரச்சினைகளில் மக்களுக்கு நியாயம் செய்யும் வகையில் உண்மைகளை எழுதுவதற்காக காவல்துறையினர் ஏதும் இவர்களைத் தாக்குகிறார்களா? பொய் வழக்குப் போடுகிறார்களா?
கார்பொரேட் மருத்துவமனைகளில் நடக்கும் ஊழல்களை வெளிப்படுத்துவதால். மக்களுக்குச் சார்பாக இருக்கிறார்களே என்பதற்காக இப்படித் தாக்குதலா?
அரசாங்க மருத்துவ மனைகளில் போதிய மருந்துகள் இல்லை, வசதிகளில்லை என இவர்கள் அரசாங்கத்தை எதிர்த்துப் போராடுவதால் அரசாங்கம் இவர்களைப் பழி வாங்குகிறதா?
அப்படியெல்லாம் நடப்பதாகத் தெரியவில்லையே. பொதுமக்களிடம் இருந்தல்லவா இவர்களுக்கு ஆபத்தாமே...?
டாக்டர் சார், மெடிகல் ஆபீசர் சார்... என்ன பிரச்சினை உங்களுக்கு? கொஞ்சம் விளக்கமாகச் சொல்லுங்கள்.
கருத்துகள் இல்லை:
கருத்துரையிடுக