டிசம்பர் 6, 1992-ஆம் ஆண்டு முஸ்லிம்களின் வழிப்பாட்டுத் தலமுமான பாபரி மஸ்ஜித் இடிக்கப்பட்டு 21 ஆண்டுகள் நிறைவுறுகின்றது.
21 ஆண்டுகள் கழிந்த பிறகும் அன்று நிகழ்ந்த அநீதிக்கும் இதுவரை தீர்வு கிடைக்கவில்லை. ஒவ்வொரு ஆண்டும் பல்வேறு முஸ்லிம் அமைப்புகள் பாபரி மஸ்ஜித் இடிப்பைக் கண்டித்தும், அதன் நினைவலைகளை மக்கள் மன்றத்தில் கொண்டு சேர்ப்பதற்கும் பல்வேறு வழிகளில் போராட்டங்களை நடத்தி வருகின்றனர்.
தமிழகத்தில் இவ்வாண்டு தமிழ்நாடு முஸ்லிம் முன்னேற்றக்கழகம், பாப்புலர் ஃப்ரண்ட் ஆஃப் இந்தியா, ஆல் இந்தியா இமாம் கவுன்சில், மனித நேய மக்கள் முன்னேற்ற கழகம், இந்திய தவ்ஹீத் ஜமாஅத் உள்ளிட்ட அமைப்புகள் சார்பாக பல்வேறு எதிர்ப்பு நிகழ்வுகள் நடந்தேறின.
த.மு.மு.க மற்றும் மனிதநேய மக்கள் கட்சி சார்பாக தமிழகம் முழுவதும் பல்லாயிரக்கணக்கான மக்களை திரட்டி மாபெரும் மக்கள் திரள் போராட்டத்தை நடத்தியது. பாபர் மஸ்ஜித் வழக்கை விரைந்து முடிக்க வேண்டும், இடித்தவர்கள் மீதான வழக்கை துரிதப்படுத்த வேண்டும், மீண்டும் பாபர் மஸ்ஜிதை அதே இடத்தில் கட்ட வேண்டும் என்ற கோரிக்கைகளுடன் இந்த மக்கள் திரள் ஆர்ப்பாட்டத்தை நடத்தியது. மாவட்ட தலைநகரங்களில் மக்கள் திரள் ஆர்ப்பாட்டங்கள் நடைபெற்றன. இதில் பாபரி மஸ்ஜித் இடிப்புக் குறித்த தகவல்களை பேச்சாளர்கள் தங்களது உரையில் குறிப்பிட்டனர்.
பாப்புலர் ஃப்ரண்ட் ஆஃப் இந்தியா சார்பாக ‘பாபரி மஸ்ஜித் மீட்பும், பாசிச எதிர்ப்பும் தேசத்தின் கடமை’ என்ற தலைப்பில் தமிழகத்தின் பல பகுதிகளிலும் பொதுக்கூட்டங்கள், கருத்தரங்குகள் நடத்தப்பட்டன.
‘மறக்காமலிருப்பதே பாசிச எதிர்ப்பின் முதல் நிலை’ என்ற தலைப்பில் போஸ்டர் பிரச்சாரம், பாபரி மஸ்ஜித் இடிப்புக்குறித்த தகவல்கள் அடங்கிய நோட்டீஸ் விநியோகம், பாபரி மஸ்ஜித் புகைப்படம் பதித்த டீ ஷர்ட்டுகள் அணிதல், பாபரி மஸ்ஜித் குறித்த ஆவண அனிமேஷன் சி.டி திரையிடல் உள்ளிட்ட நிகழ்வுகள் நடந்தன.
ஆல் இந்தியா இமாம் கவுன்சில் சார்பாக தர்ணா போராட்டம் நடைபெற்றது.
மனித நேய மக்கள் முன்னேற்றக்கழகம் சார்பாகவும், இந்திய தவ்ஹீத் ஜமாஅத் சார்பாகவும் பல்வேறு இடங்களில் போராட்டங்கள் நடைபெற்றன.
நன்றி நியூ இந்தியா
கருத்துகள் இல்லை:
கருத்துரையிடுக