பெரம்பலூர் அருகே பஸ்சில் ரிமோட் கன்ட்ரோல் மூலம் குண்டு வெடிக்க வைத்தது கண்டுபிடிக்கப்பட்டுள்ளது.
அரியலூர் மாவட்டம் ஜெயங்கொண்டத்தில் இருந்து கடந்த 14ம் தேதி இரவு திருச்சி மாவட்டம் துறையூருக்கு தனியார் பஸ் புறப்பட்டது. மாவிலங்கை பகுதியை சேர்ந்த சந்திரன் (28) பஸ்சை ஓட்டினார். கண்டக்டராக குரும்பலுரைச் சேர்ந்த ராஜேஷ் இருந்தார்.
பெரம்பலூர் மாவட்டம் ஈச்சம்பட்டி லாடபுரம் பிரிவு பாதை அருகே சென்ற போது, டிரைவர் சீட்டுக்கு பின்புறம் 4வது சீட்டுக்கு அடியில் பெட்ரோல் குண்டு வெடித்தது. பதறிய டிரைவர் பஸ்சை நிறுத்தினார். பயணிகள் அலறி அடித்து இறங்கி ஓடினர். இதில் பயணிகள் 9 பேர் காயமடைந்தனர். அனைவரும் ஆஸ்பத்திரியில் சேர்க்கப்பட்டனர்.
ஐஜி ராமசுப்பிரமணி தலைமையில் உயர் அதிகாரிகள் அங்கு வந்து விசாரணை நடத்தினர். சுதந்திர தினத்துக்கு முதல்நாள் இது நடந்ததால் பரபரப்பு ஏற்பட்டது. சம்பவம் குறித்து டிரைவர், கண்டக்டர்களிடம் போலீசார் விசாரித்தபோது, ஈச்சம்பட்டியில் அந்தப் பகுதிக்கு தொடர்பே இல்லாத 4 பேர் கையில் பையுடன் ஏறியது தெரிய வந்தது. இதனால் பெட்ரோல் குண்டுகளை அவர்கள் தான் கொண்டு வந்திருக்க வேண்டும் என போலீசார் கருதுகின்றனர். அவர்கள் யார், எப்படி இருந்தார்கள், என்ன உடை உடுத்தியிருந்தார்கள் என டிரைவர், கண்டக்டரிடம் பெரம்பலூர் டவுன் போலீசார் விசாரணை நடத்தினர்.
அவர்கள் கூறிய அங்க அடையாளங்களைக்கொண்டு ஈச்சம்பட்டியில் ஏறிய 4 பேரை தேடும் பணியில் போலீசார் ஈடுபட்டனர். அவர்களை பிடித்த பிறகு தான் இந்த பெட்ரோல் குண்டு தொடர்பான தகவல் கிடைக்கும் என போலீசார் எதிர்பார்க்கிறார்கள்.
குற்றவாளிகளை பிடிக்க எஸ்பி சோனல்சந்திரா மேற்பார்வையில் டிஎஸ்பி, இன்ஸ்பெக்டர், எஸ்ஐ தலைமையில் 15 தனிப்படை அமைக்கப்பட்டு போலீசார் தீவிரமாக தேடி வருகின்றனர்.
மேலும் வெடி குண்டு ரிமோட் மூலம் இயக்கப்பட்டு வெடிக்க வைத்திருப்பது விசாரணையில் தெரிய வந்துள்ளது. பஸ்சில் கைப்பற்றப்பட்ட ஜெலட்டின், இரும்பு துகள்கள் ஆய்விற்கு அனுப்பப்பட்டுள்ளது. பஸ்சில் பயணம் செய்த 71 பேர் நடத்துனரால் அடையாளம் காணப்பட்டு அவர்களிடமும் போலீசார் தனித்தனியே விசாரணை நடத்தி வருகின்றனர். மேலும் க்யூ மற்றும் குற்றப்பிரிவு போலீசாரும் விசாரணை நடத்தி வருகின்றனர்.
கருத்துகள் இல்லை:
கருத்துரையிடுக