ஃபலஸ்தீன் காஸாவின் கோரிக்கைகளை பூர்த்தியாக்காமல் இனியும் தற்காலிக போர் நிறுத்தத்திற்கு தயாரில்லை என்று ஹமாஸ் திட்டவட்டமாக அறிவித்துள்ளது.
எகிப்து மத்தியஸ்தத்தின் பெயரில் அறிவிக்கப்பட்ட 72 மணிநேர போர் நிறுத்த ஒப்பந்தம் இன்று காலை முடிவடையும் வேளையில் ஹமாஸ் இதனை தெரிவித்துள்ளது.
போர் நிறுத்தம் முடிவுக்கு வந்தால் இஸ்ரேல் மீதான தாக்குதல் தொடரும் என்று ஹமாஸின் செய்தி தொடர்பாளர் இஸ்மாயீல் ரத்வான் அல்ஜஸீராவுக்கு அளித்த பேட்டியில் தெரிவித்தார். தங்களுடைய உண்மையான கோரிக்கைகளை அங்கீகரிக்காமல் தற்காலிக போர் நிறுத்தத்தை நீட்டிக்க முடியாது. இதுவரை ஹமாஸின் கோரிக்கைகளை அங்கீகரிக்க இஸ்ரேல் தயாராகவில்லை. ஆகையால் தற்காலிக போர் நிறுத்தத்திற்கு ஹமாஸ் தயாரில்லை என்று ரத்வான் தெரிவித்தார்.
நான்கு வார காலமாக இஸ்ரேல், ஃபலஸ்தீன் காஸாவில் நடத்திவரும் கொடூர தாக்குதல்களுக்கிடையே எகிப்து மத்தியஸ்தம் வகிக்க 72 மணிநேர போர்
நிறுத்தம் அறிவிக்கப்பட்டது. இதனைத் தொடர்ந்து கடந்த 3 தினங்களாக காஸாவில் இஸ்ரேல் தாக்குதல் நடத்தவில்லை. போர் நிறுத்தத்தை நீட்டிக்க இஸ்ரேல்
தயாராக இருப்பதாக அங்குள்ள ஊடகங்கள் செய்தி வெளியிட்டதன் பின்னர் ஹமாஸ் இதனை திட்டவட்டமாக தெரிவித்துள்ளது.
அதேவேளையில், எகிப்தின் தலைநகரான கெய்ரோவில் போர் நிறுத்தத்தை நீட்டிப்பதற்கான முயற்சி தொடருகிறது. ஹமாஸ் மற்றும் இஸ்ரேலின் பிரதிநிதிகளுடன் வெளிப்படையான பேச்சுவார்த்தையை எகிப்திய பிரதிநிதிக்குழு தற்போது தொடருகிறது.
தாக்குதல் தற்காலிகமாக நிறுத்தப்பட்டதை தொடர்ந்து காஸாவுக்கு அருகே வசித்து வந்த 10 ஆயிரம் இஸ்ரேலியர்கள் தற்போது வீடுகளுக்கு திரும்பி வருகின்றனர். காஸாவில் இதுவரை 10 ஆயிரத்திற்கும் அதிகமான வீடுகள் சேதமடைந்துள்ளதாக ஐ.நா புள்ளிவிபரம் தெரிவிக்கிறது.
கருத்துகள் இல்லை:
கருத்துரையிடுக