பத்தாம் வகுப்பு நமதூர் மாணவிகளின் சாதனை

பெரம்பலூர் மாவட்டத்தில் எஸ்எஸ்எல்சி அரசுப் பொதுத் தேர்வில் அரசுப் பள்ளி மாணவர்களின் தேர்ச்சி கடந்த ஆண்டை விட 9.02 சதம் அதிகரித்துள்ளது என்றார் மாவட்ட ஆட்சியர் தரேஸ் அஹமது.

பெரம்பலூர் மாவட்டத்தில் எஸ்எஸ்எல்சி அரசுப் பொதுத் தேர்வை 9,275 மாணவ, மாணவிகள் எழுதினர்.

இதில், 8,383 (90.38 சதவீதம்) மாணவ, மாணவிகள் தேர்ச்சி பெற்றனர். கடந்த ஆண்டில் 84.46 சத மாணவ, மாணவிகள் தேர்ச்சி பெற்ற நிலையில், நிகழாண்டு 5.92 சதவீதம் கூடுதலாக தேர்ச்சி பெற்றுள்ளனர்.

பெரம்பலூர் மாவட்ட அரசு பள்ளிகள் அளவில், பாடாலூர் அரசு மேல்நிலைப் பள்ளி மாணவி ஆர். சுபாஷினி 493 மதிப்பெண்கள் பெற்று முதலிடத்தையும்,லெப்பைக்குடிக்காடு அரசு பெண்கள் மேல்நிலைப் பள்ளி மாணவி வி. பாத்திமா பானு, கீழப்பெரம்பலூர் அரசு மேல்நிலைப்பள்ளி மாணவி டி.தமிழரசி ஆகியோர் 489 மதிப்பெண்கள் பெற்று இரண்டாம் இடத்தையும், லெப்பைக்குடிக்காடு அரசு பெண்கள் மேல்நிலைப்பள்ளி மாணவி ஹெச்.அமீர்ஹபீப் 487 மதிப்பெண்கள் பெற்று மூன்றாம் இடத்தையும் பெற்றனர்.

பெரம்பலூர் மாவட்டத்தில் அரசு பள்ளிகளில் பயிலும் மாணவ, மாணவிகளின் தேர்ச்சியை அதிகரிப்பதற்காக பல்வேறு சிறப்பு வகுப்புகள் விடுமுறை நாள்களில் நடத்தப்பட்டன.

இதன் காரணமாக அரசு பள்ளிகளைச் சேர்ந்த மாணவ, மாணவிகளின் தேர்ச்சி வீதம் கடந்த ஆண்டை விட 9.02 சதம் உயர்ந்துள்ளது.

இந்நிகழ்ச்சியில், முதன்மை கல்வி அலுவலர் கே.ஜி.மல்லிகா, மாவட்ட கல்வி அலுவலர் (பொறுப்பு) வி.சுப்பிரமணியன் மற்றும் பள்ளி தலைமை ஆசிரியர்கள், ஆசிரியர்கள், அதிக மதிப்பெண் பெற்ற மாணவ, மாணவிகள், பெற்றோர் உள்ளிட்டோர் கலந்து கொண்டனர்.

நன்றி தினமணி