பாஜகவுடன் கைகோர்க்கும் காங்கிரஸ்

ஒரு காலத்தில் மதவாதம் மற்றும் பிரிவினைவாத கட்சியென்று பாஜகவின் மீது புழுதி வாரி இறைத்த காங்கிரஸ் கடந்த பாராளுமன்ற தேர்தலுக்கு பிறகு தமது நிலைபாட்டில் பெரிய மாற்றத்தை உருவாக்கியுள்ளது மதசார்பின்மை சக்திகளுக்கு பேரதிர்ச்சியை அளித்திருக்கிறது.

பாஜகவின் அகண்ட பாரதம்(இந்துத்துவா)கொள்கைக்கு உயிரோட்டம் கொடுக்கும் வகையில் சமீபத்தில் நடைபெற்ற பல்வேறு மாநில சட்டமன்ற தேர்தல்களில் மதசார்பின்மை கட்சிகளின் வாக்குகளை பிரித்தாளும் சூழ்ச்சியை பாஜக செய்ததோ?இல்லையோ?காங்கிரஸ் கச்சிதமாக செய்தது,செய்தும் வருகிறது.

ஊர் இரண்டு பட்டால்…கூத்தாடிக்கு கொண்டாட்டம் என்பது கூடவா 60 ஆண்டுகால காங்கிரஸுக்கு தெரியாமல் போனது?

நிஜமாகவே மதவாத பாஜகவை வீழ்த்த வேண்டுமென நினைத்திருக்குமானால்…மகாராஷ்ட்ரம்,ஹரியானாவில் மதசார்பின்மை சக்திகளை ஓரணியில் திரட்டி ஈகோயிசத்தை விட்டு கொடுத்து பாஜகவுக்கு எதிராக காங்கிரஸ் களம் கண்டிருக்க வேண்டுமே?

நடந்தது என்ன?15ஆண்டு கால நட்பும் 10ஆண்டு கால ஆட்சியின் பங்குதாரருமான தேசியவாத காங்கிரஸை ஒருசில சீட் எண்ணிக்கைக்காக கூட்டணியிலிருந்து வெளியேற்றியது பாஜகவின் வெற்றிக்கு வழி வகுக்குமென்பது உள்ளங்கை நெல்லிக்கனியல்லவா?

காங்கிரஸின் மதசார்பின்மைக்கெதிரான துரோகத்தால் இன்று மகாராஷ்ட்ரத்தில் பாஜக-சிவசேனை கூட்டணி ஆட்சி உருவாகியுள்ளது.

காங்கிரஸின் இந்த நம்பிக்கை துரோகத்தை புரிந்து கொண்ட மகாராஷ்ட்ர முஸ்லிம்கள் காங்கிரஸின் கோட்டை என்று சொல்லப்படும் மத்திய அவுரங்காபாத் மற்றும் பைகுலா ஆகிய இரண்டு தொகுதிகளில் அஸாதுத்தீன் உவைசியின் மஜ்லிஸ் இத்திஹாதுல் முஸ்லிமீன் கட்சி வேட்பாளர்களை வெற்றி பெற செய்து பைகுலாவில் மூன்றாமிடத்திற்கும் அவுரங்காபாத் தொகுதியில் ஆறாமிடத்திற்கும்  காங்கிரஸை ஒதுக்கி விட்டனர்.

அதே தவறை இப்போது நடைபெறவிருக்கும் ஜார்க்கண்ட் மாநில சட்டமன்ற தேர்தலில் பாஜகவின் வெற்றிக்கு வழிவகுக்கும் வகையில் 15மாத கால நட்பு கட்சியான சிபுசோரனின் ஜார்க்கண்ட் முக்தி மோர்ச்சாவை தமது கூட்டணியிலிருந்து வெளியேற்றியுள்ள காங்கிரஸ் அந்த மாநிலத்தில் மதசார்பின்மை சக்திகளின் வாக்குகளை பிரித்து நான்கு முனை போட்டியை ஏற்படுத்தி பாஜகவின் எளிதான வெற்றிக்கு வழி வகுத்துள்ளது.

சட்டமன்ற தேர்தல் நடைபெறும் ஒவ்வொரு மாநிலத்திலும் பாஜகவின் வெற்றியை மட்டுமே முன்னிறுத்தும் காங்கிரஸின் அணுகுமுறைக்கு மரியாதை செய்யும் விதத்தில் கடந்தகால காங்கிரஸ் ஆட்சியின் திட்டங்களுக்கு தற்போதைய மோடியின் அரசு உயிரோட்டம் கொடுத்து வருவது கவனிக்கப்பட வேண்டியதாகும்.

பாஜகவால் குற்றம் சாட்டப்பட்ட ஊழலின் அடையாளமான ஆதார் அட்டை திட்டம் கூட தற்போது மோடி அரசால் அங்கீகரிக்கபடுகிறதென்றால்…அதன் அர்த்தம் என்ன?பாஜகவின் கொள்கையுடன் காங்கிரஸ் நெருங்குகிறது என்று தானே பொருள்படும்.

நன்றி தூது ஆன்லைன்