“இஸ்ரேலிய யுத்த விமானங்கள் ஈரானை தாக்கும் நோக்கத்துடன் சென்றால், எமது வான் பகுதியில் வைத்து இஸ்ரேலிய விமானங்களை சுட்டு வீழ்த்துவோம்” என்று சவுதி அரேபியா இஸ்ரேலுக்கு எச்சரிக்கை அனுப்பியுள்ளதாக, இஸ்ரேலில் வெளியாகும் ஹெப்ரூ மொழி பத்திரிகை Yedioth Ahronoth செய்தி வெளியிட்டுள்ளது.
“சவுதி அரேபியா இந்த எச்சரிக்கையை நேரில் தெரிவிக்கவில்லை. அமெரிக்காவுக்கு தெரிவித்து, அவர்கள் மூலமாகவே இஸ்ரேலுக்கு தெரிவித்துள்ளது” எனவும் அப் பத்திரிகை செய்தி குறிப்பிடுகிறது.
அமெரிக்கா, சவுதி அரேபியாவுக்கும் நண்பனாக உள்ளது, இஸ்ரேலுக்கும் நெருக்கமாக உள்ளது. சவுதி அரேபியாவின் யுத்த விமானங்களை சுட்டு வீழ்ந்தும் சாம் ரக ஏவுகணைகள் அனைத்தும் அமெரிக்க தயாரிப்புகளே!
இப்படி ஒரு சாத்தியம் உள்ளதை கடந்த வாரமே நியூயார்க் டைம்ஸ் தெரிவித்திருந்தது. அவர்கள் வெளியிட்டிருந்த ஆய்வில், ஈரானின் 4 பிரதான அணு உலைகளையும் முழுமையாக குண்டுவீசி தகர்க்க வேண்டுமானால், இஸ்ரேலிய விமானப்படை குறைந்தது 100 யுத்த விமானங்களை உபயோகிக்க வேண்டும் என்று தெரிவித்திருந்தது.
இஸ்ரேலில் இருந்து ஈரானுக்கு யுத்த விமானங்கள் செல்வதானால், சவுதி வான்பரப்பு மேலாக பறப்பதே குறைந்த தொலைவுள்ள விமான ரூட். அதுகூட சுமார் 1000 மைல்கள் வரை பறந்துதான், இலக்கை அடைய முடியும்.
சவுதி எச்சரிக்கை விடுத்துள்ளதால், இஸ்ரேல் கண்டிப்பாக திட்டத்தை கைவிட்டே ஆகவேண்டும் என்றில்லை. சவுதி மேலாக பறக்காமல், வேறு சுற்றுப் பாதை ஊடாகவும் இஸ்ரேலிய விமானங்கள் ஈரானை அடைய முடியும். வட திசையில் பறந்து, துருக்கி வான் பரப்பை கடந்து ஈரானுக்குள் நுழைய முடியும். அல்லது, நேரே கிழக்கே பறந்தும் செல்லலாம். அப்போது, ஜோர்தான் மற்றும் ஈராக் மேலாக பறக்க வேண்டியிருக்கும்.
இந்த 3 நாடுகளும், இஸ்ரேலிய விமானங்கள் தமது நாட்டுக்கு மேலாக பறக்க அனுமதிக்குமா என்பது பெரிய கேள்வி!
தகவல் : சவுதியில் இருந்து நமது நிருபர்
கருத்துகள் இல்லை:
கருத்துரையிடுக